اعلانات بلدنا .... البقاء لله

شفت حلاوة أعلانات تركيا ولبنان ودبى؟!شفت الجمال؟!عرض سريع،مبسط،ساحر لأحلى مناطقهم و منشئاتهم السياحية ولمحة من الفلكلور اللى يميزهم..زبطوا المسائل!!بذكاء شديد يسحرك، زاوية التصوير، نظافة الشوارع، نقاء المياه...مش مهم يكون ده الحقيقة الباحتة، بس المهم ان ده أعلان رسالته ’ تعالى اتفرج على بلدنا واتمتع وادفع فلوس كتير برضاك ‘ ويهيأ لى انهم عرفوا يوصلوا الرسالة صح، حتى لو مرحتش، كفاية انك تبقى مبهور ونفسك تشوف الجمال ده على الحقيقة...
طب بذمتكم ...دبى عندها آثار ايه؟!، لبنان عندها بحر أبيض وأحمر و نيل؟، طب تركيا فيها آثار فرعونية شاهدة على أبداع المصريين القدامى؟ لكن أحنا طبعا رواد فى التفاهة والهيافة والفشل وحبة قلة أدب فوق البيعة... وعشان كدة كان لازم فى أعلانتنا يظهر رقاصات..من فيفى عبده لدينا يا قلبى لا تحزن.. ولازم نقول ان عندنا ملاهى ليلية..وبنقدم خمرة لان احنا ناس سبور... يعنى من الأخر هتتبسط عندنا وتتظبط وتعمل مزاج جامد!!
أنا رأيى الشخصى ان ممكن نعمل نيو لوك لأعلاننا السنة دى.. الأعلان يتضمن بعض مشاهد الفيديو كليب على حبة صور للكوبلز اللى قاعدين على البحر،على لقطتين من مشاهد التعذيب و بعدين لقطتين من مظاهرة القضاة أو الصحفيين، و كمان صورتين من ناس مسجونة بدون محاكمة.. و نختم برقصة دويتو لفيفى ودينا – مسك الختام طبعا - عشان نقول للسايح "Only in Egypt" ممكن تلاقى كل اللى انت عايزه وكل تناقضات الدنيا..وبقترح تبقى ال back ground أغنية الحنطور للشاعر العظيم سعد الصغير باشا .. عشان السايح يعرف اننا بنحترم حقوق الحيوان جدا وبنغنيله حتى لو محترمناش حقوق الأنسان!!