حتى أبليس طفش !!!

على باب سفاره كندا..

لمحت ابليس و ف ايده استماره..

بقول له على فين.. قاللى بص..يا هجره يا اعاره ..

يا عم زهقت كفرت ..الاقيش معاك سيجاره ..

انا انتهيت خلاص..

لا نافع وسواس و لا خناس..

و لا ليا عيش وسط الناس..

دى عالم مجانين ..

عندكوا فائض فساد

فى كل البلاد ..

و مش محتاجين شياطين ..

مليش عيش فى البلد دى ..بقالى سنين عاطل..

و انتو بتعرفوا تقلبوا الحق باطل..

و تسلكوا القاتل..

و تمشوا ف جنازه المقتول ..و مفيش مشاكل ..

يا عم ده انا بقيت اوسوس بالمقلوب ..

و اقول للحرامى كفايه بقى تـــــــــــــــــــــوب ..

انت هاتعمل كل الذنوب لواحدك ..و انا ابليس..

اشتغل واعظ و لا كمسارى ف اتوبيس..

يا عم ده انا زمان ..

كنت استنى حد ينسى يسمى و هو بياكل لقمته ..

و دلوقتى كل اكلكم ملوث و بصراحه الواحد خايف على صحته ..

ده مفيش ضمير اساسا ..عشان اموته ..

و كل واحد بمزاجه .. خربانه ذمته..

يا عم ده كل حاجه اتسرقت..

و كده الاجيال الجديده م الحرميه اتظلمت ..

لطشت معايا ..

خرجت ف مظاهره ..مع الناس اللى بتقول كفايه ..

و برده مفيش فايده