أسئلة كتييير

الايميل ده بردو عجبنى
سألوني كتير – بقلم يوسف معاطي –
هتفت بجاري وأنا نازل : إزيك يا بشمهندس عامل إيه دلوقت؟!فإذا به يرد عليا بسؤال إنت اللي عامل إيه؟! مع إني أنا اللي سألته ، أسأل البواب، لمعت العربيه؟! فيرد عليا أنهي عربيه ؟ شفتوا تلامه أكتر من كدا؟! عربيتي ياتور،هوه أنا عندي غيرها؟!فيرد، إنت عاوزني أطوقهالك؟! أرد بغلاسه أكتر: لأ العفو، تحب أمسح لك أنا السلم ؟! فيرد أنهو سلم؟؟أسئلة أسئلة ، تحيط بي من كل جانب تطبق على نفسي .
أعطي السكرتيره المقال لتكتبه على الآله الكاتبه ، ثم أسألها كتبتي المقال؟!فترد: المقال ده ؟! ياناس سأفقد أعصابي ، أصرخ فيها أيوه ، المقال ده ، هوه في غيره؟ تسألني تاني ، يعني مفيش غير ده بأه ؟؟
أذهب لألحق بموعد على المقهى جلست لوحدي ، لا أريد أنا أكلم أحدا ، اقترب الجرسون وسألني تشرب إيه؟! قلت شاي ،هل غلطنا في ذلك قلنا شاي ، فلماذا يرد عليا بسؤال سخيف ؟ شاي يا باشا ؟! أيوه شاي ،وغور بأه، ضحك الجرسون، ثم عاد وقال بالنعناع ولا بالقرنفل؟؟قلت له بالزفت،هات شاي وخلاص ،ضحك جدا وقال : والزفت دا يبقى نعناع ولا قرنفل ؟! واتتني رغبه جهنميه في أن أخبطه بالكرسي على نافوخه ، ولم يكبح جماح رغبتي هذه ،إلا أنني تصورت أن أحدهم ويسألني ضربته ليه؟! أخيرا أتى صديقي لينقذني من الجرسون والشاي والأسئله ، قلت له تفتكر الأحوال ح تتصلح ؟ فإذا به يسألني أحوال إيه ؟ ألا توجد إجابه لأي سؤال يا ناس ؟ الأحوال يا أخي الأحوال، قال لي تفتكر إنها ح تتصلح ؟! وهل أنا أسألك لتسألني !رن جرس التليفون وإذا بصوت المدام ، وهي تتحفني بمسلسل الأسئله إياه : إنت فين ؟! ومين قاعد معاك؟ وبتعمل إيه دلوقت ، مش ح تيجي ؟! قلت لها : أنا مخنوق شويه ، ماتيجي نروح سينما ؟ فسألتني عاوزتشوف فيلم ؟
شفتوا السؤال !! بما أنني لا أتذكر أنني ذهبت إلى السينما لسبب آخر سوى إني عاوز أشوف فيلم، فلم أعر سؤالها أي اهتمام ، وقلت لها أنا جاي دلوقت فإذا بها تسألني ذلك السؤال الفريد من نوعه ، جاي البيت ؟!!!
وضعت المفتاح في الباب ودخلت فأتاني صوتها من الداخل : أنت جيت؟؟
ولما كان الباب بابي والبيت بيتي ، وأنا الرجل الوحيد في هذا الكون اللي معايا مفتاح الشقه ، فكان من العبث أن أرد على سؤالها وأقول ، أيوه أنا جيت .
سألت المدام مش ح نتغدى ؟ فردت المدام بسؤال برضه أحط لك الأكل ؟
وحتى لا أفقد أعصابي فتحت الباب خارجا، فسألتني تاني وأنا خلاص عالسلم إنت نازل ؟! قلت لها خارج أتغدى بره مع أصحابي فسألتني تالت : يعني مش هتتغدى في البيت ؟!!!
شوفوا يا اخواننا ،أنا لا حتغدى في البيت ولا ح تغدى مع أصحابي ،ولاعاوز آكل ولا أشرب ولاأكلم حد ولا حد يكلمني ، ارحموني أبوس إيديكو من الأسئله اللي مبتخلصش دي !!!!!