هاتعمل ايه فالصيف ده و غيروه ؟

البداية لازم تكون كده " انت واقف بين أدين ربنا – عز و جل – و بيسألك عن 4 حاجات منهم ’ شبابه فيما ابلاه ‘ ( يعنى ربع الحاجات اللى ربنا بيسألك عنها ) هتقول ايه ؟
؟ خرجت مع اصحابى و دخلت السينما و دخلت اون لاين و عملت شات مع كل اصحابى
كل دى حاجات جميلة بس مينفعش تقضى الفترة الوحيدة اللى ربنا خصها بالسؤال كدة !!
طب و المطلوب ؟ تستثمر وقتك عشان تعيش حياتك بالطول و العرض من غير ما تغضب ربنا و كمان و انت بتحضر لليوم اللى هتقبلوه فيه ان شاء الله.
السؤال اللى ممكن يخطر على بالك هو انا professional يعنى عشان انصحك ؟ الاجابة لأ ، بس انا باكتب كاجتهاد منى و عن تجربة خاصة و بينى و بينك طمعانة فى حبة حسنات هيزيدوا فى ميزانى لو انت استفدت باللى هكتبه!!
كلمة السر : نظم وقتك
والله لو نظمت وقتك هاتعمل كل اللى نفسك فيه و يتبقى عندك شوية وقت مش عارف تعمل بيهم ايه !!!
طب نقول الاساسيات الاول اللى لازم تضعها فى بالك و انت بتنظم وقتك :
مواعيد الصلاة ، صلة الرحم ، بر الوالدين و مساعدتهم فى البيت او براه ، و شوية وقت لربنا ( حفظ قرآن ، الصلاة فالمسجد ، حضور درس دينى ... )
طب و الحاجات اللى انت بتحلم بيها طول ما انت بتذاكر و بتمتحن :
تخرج مع اصحابك – تدخل online – تدخل السينما – تتفرح على كل الفلام اللى فى mbc2 - تنام – و ماتعملش حاجة خاااااالص .
طب و الحاجات اللى انا بقترح عليك تتكرم و تضعها فى جدول اعمالك :
كورسات فى المجال اللى انت بتدرسه تفيدك فى شغلك بعد التخرج - تدريب عملى – كورسات لغة – حفظ قرآن - تعمل مع اصحابك مشروع صغير تبيعوا فيه حاجات انتوا بتعملوها بأديكم – تلعب رياضة مفيدة - تنمى مواهبك ( شعر ، رسم ، ...) – تحاول تخرج مع اهلك اللى فى سنك و ترجع علاقتك بيهم – تنمى حب القراءة عندك ...
الكلام جميل لكن احنا عايزين الفعل ... ممكن ننظم وقتنا بحيث اننا نداوم على الاساسيات و نستفيد من وقتنا و نعمل اللى حلمنا بيه ايام الدراسة ...
اه ةالله ممكن
خد عندك بعض المقترحات لجدول اعمالك ( فى الاسبوع) بس مش داخل فيه الاساسيات لأن دى مفروغ منها و ده واجب عليك ، و الحاجات اللى كان نفسك تعملها انا متأكدة من انك هتلاقى ليها وقت ، و على العموم انا هاعتبر انك هتدخل online كل يوم و تعمل chatting مع كل اصحابك و تتفرج على التلفزيون كل يوم ( احنا بردو فى اجازة) و هتخرج مع اصحابك مرتين فى الاسبوع ( لو اكتر من كده هتزهق منهم)

Form 1 : كورس تلات ايام + كورس لغة يوم واحد + حفظ ربع حزب قرآن ( ممكن تخليها ساعتين بعد صلاة الجمعة ) + تقرا نصف كتاب ( كل كتاب تقراه فى اسبوعين ) بس يكون كتاب كبير و محترم مش قصة صغيرة ، و مافيش مانع تخلى وقت تانى تقرأ فيه القصص اللى بتحبها.

Form 2 : تلعب رياضتك المفضلة 3 ايام + تاخد كورس لغة يومين + تقرأ الاخبار يوميا + تاخد الاطفال اللى فى عيلتك و تفسحهم بره + تروح مرة تزور ملجأ اطفال

Form 3 : Training خمس ايام الصبح + درس تحفيظ قرآن مرة فى الاسبوع + تزور جدتك او اى حد من اقاربك + تعطى شوية من وقتك الثمين عشان موهبتك

Form 4 : اعمل مشروع صغير مع اصحابك ، ممكن كل واحد منكم يشتغل فى بيته او فى النادى او حتى فى الكلية .... و بعدين بيعوا منتجاتكم لأى شركة اخرى او حتى للافراد ( و محدش يقوللى ده مش ممكن لأن والله اصحابى عملوها ) + و بما انك Business man دلوقتى خد كورس فى ال Business Administration و اتعلم ازاى تدير مشروعك و تزود ربحك + و بما انك انت و اصحابك هتتقبلوا كتيير ليه ماتتفقوش ان كل واحد منكم يقرا كتاب او مقال و تناقشوه او فيلم عجبكم و تشاركوا افكاركم و احلامكم و ممكن كمان كل واحد يعلم التانى حاجة ، واحد يعلمكم لغة و واحد يقرا عليكم شعره و واحد يعلمكم تجويد القرآن

و ممكن تدمج اى بند من اى form مع بند تانى من form تانى حسب ميولك لأن دى اجازتك
و ماتنساش تستمتع بوقتك ، لو اقتنعت ان الكورس ده هايفيدك ، او زيارتك لجدتك ممكن تكون سبب فى دعوة تدخلك الجنة ، او وجودك مع اطفال ممكن يسعد ربنا ، او ان حفظ القرآن ممكن يباركلك فى بقيت وقتك ، يعنى من الاخر لو بصيت لنصف الكوب المليان فى كل حاجة بتعملها هتستمتع بكل لحظة فى اجازتك...
نظم وقتك عشان اما ترجع للدراسة تانى ماتندمش انك ما عملتش حاجة مفيدة فى اجازتك و لا تندم انك ماستمتعتش فى اجازتك .... وازنها و احسبها و قوللى ..