هى مشكلة البطالة سببها احنا ولا هما ؟!!!!!

اكيد الحكومة ليها دور فى مشكلة البطالة بس الناس قتلوا دور الحكومة بحثا !!!
انا بقى جاية اقول " احنا عندنا مشكلة اللى ممكن يحلوها مش بيحاولوا عشان كدة احنا لازم نحلها بنفسنا عشان ده مستقبلنا احنا مش هم"
أزاى ممكن نحل مشكلة البطالة ، او ازاى كل واحد منا يتجنب انه يكون واحد من اللى قاعدين على القهوة كل اللى بيعملوه بينقشوا ازاى الحكومة وحشة من غير ما ياخدوا اى خطوة ايجابية ، او انها تكون واحدة بتقول " يعنى الولاد مش لاقيين شغل ، انا هلاقى ؟ و اهو مصير كل بنت انها تقعد فى البيت "!!!

صحيح احنا بنتعب اوى عشان نخلص كل سنين الدراسة الاساسية لكن طول ما انت عايش فى مصر خلى عندك ال option بتاع انك تشتغل فى مجال غير بتاعك حتى و لو عقبال ما تلاقى فرصة فى مجالك او تحصل على مبلغ تفتح بيه مشروع صغير فى مجالك .

لو انت ليك احلام لمستقبلك و نفسك و هاتموت و تشتغل فى مجالك ابدأ فكر فى انك تسيب مصر و تروح اى مكان يقدروا فيه عبقريتك و طموحاتك لغاية ما تنجح و تتمز و بعدين تبقى ارجع عشان يستفيد ولاد بلدك من علمك " قل سيروا فى الارض " و " ارض الله واسعة " ، بس ضع فى بالك انك طول ما انت خارج مصر تكون واجهة مشرقة لمصر و المصريين و تكون مثال على المصرى الدؤوب الصابر الامين فى عمله و خلى فى بالك صورة احمد زويل و هو رايح امريكا و محدش معبره و بعدين و هو راجع و مستقبلينه استقبال الامراء و بلاش الشريط بتاع " هى مصر عملتلنا ايه ؟ و الحمدلله اننا سبناها " و نظامة شتيمة المصريين قدام الاجانب ، خلى المواضيع دى ما بينا و ماتفضحوناش .

طب انت ذاكرت و اتفوقت و اتخرجت و دورت على شغل و بعد ما رجليك اكسرت اقعدت على القهوة بردو !!! ليه ماتبدأش تفكر ازاى تستغل الوقت الفاضى اللى عندك ده
أ . خد كرسات فى مجالك او مجال تانى تكون بتحبه على الاقل اما تدور على شغل تانى تكون زودت حاجة فال C.V. بتاعك .
ب . اتعلم اى حرفة او صنعة بدل ما احنا بنستورد المقلمة لغاية دلوقتى من الصين !! اتعلم ازاى تعمل اشكال من الخشب ، الورق ، اتعلمى كروشيه ، تريكوه ، و بيعوا منتجاتكم و طوروها ، ده مش عيب خلى ثقتقك فى نفسك كبيرة ، ده الناس اللى بتعمل حاجة غلط بتبقى عندها ثقة و مش مكسوفة تقوموا انتو تكسفوا انكم تعملوا حاجة صح ، يعنى مش مكسوفين و انتو قاعدين على القهوة و بتاخدوا من بابى المصروف لسة ؟!
ج . نمى مواهبك ، رسم ، غنا ، شعر ... ماهو انت كدة كدة فاضى و مش بتعمل حاجة
د . العب رياضة فى النادى ، فالجيم ، ان شاالله فى الحارة بس ماتقعدش كدة ده فالحركة بركة و مين عارف يمكن حد يلقطك و تبقى ابو تريكة تانى !!!!

طب انت مش عاجبك اى حاجة من اللى فوق و قاعد فاضى تانى ، ليه متخليش الاطفال اللى فى علتك مسؤليتك ، علمهم القرآن ، روح معاهم النادى و خليهم يشتركوا فى اى لعبة " علموا اولادكم الرماية و السباحة و ركوب الخيل " و " العقل السليم فالجسم السليم " ، كلمهم عن الدين و العلم و السياسة و وسع مداركهم عسى انهم مايقعوش فى اللى انت وقعت فيه و مين عارف يمكن تكون او تكونى السبب فى ان واحد منهم يبقى احمد زويل و لا صلاح الدين و لا حتى المهدى المنتظر و شوف بقى نصيبك من الحسنات .

طب مش عاجبك اى حاجة بردو !!! ليه ماتحفظش قرآن و تجمع اصحابك فالمسجد بدل ما تقعودوا على القهوة و تبق مابينكم الملايكة بدل الحشاشين !!!

طب لو ممش عاجبك العجب : نصيحة : خليك قاعد على القهوة بتاخد مصروف من باباك عشان تضع رجل على رجل و تشرب سيجارة و تقول " غريبة ، هو حال البلد وحش كده ليه " !!!!!!!!

نصيحة اخيرة للى لسة ماتخرجوش ( و انا منكم ): اديكم شايفين ايه اللى بيحصل للى بيتخرجوا ، حولوا تغيروا مصيركم ده من دلوقتى ، بدل ما تبدأ كورسات بعد التخرج ، قدامك الصيف كله ، استغلوه ، نمى موهبتك من دلوقتى ، واظب على لعب اى رياضة ، ابدأ احفظ القرآن.

و جنب كل ده ماتنساش انك بتعيش حياتك مرة واحدة عيشها بالطول و العرض فى الحلال و اتفسح مع اصحابك و اضحك و انبسط و بردو ماتنساش انك هتموت مرة واحدة و مفيش فرصة تانية ... استمتع فى حياتك ، ابنى لمستقبلك و اعمل لليوم اللى مالكش ناصر فيه الا حسناتك و رحمة ربنا .