بيقولوا في مطرب مكار
بيغني بحبك ياحمار
الواد دا وصولي وكداب
ومنافق وكمان معار
وإشمعنا لوحده اللي يحبك
كلـنا بنحبك يا حمار
********
دا لأنك فعلا متفاهم
ومبرتع فينا ومش فاهم
وبتبعد عن أي تفاهم
بعزيمة غبية وإصرار
في عِشرة ما بينا مابتهونشي
وإن هانت بردو مانقدرشي
محكمة العدل ما تحكمشي
وإن حكمت هتولع نار
********
مثلتوا علينا الثلاثية
في بطولة و كانت جماعية
وعشان ماهتكمل سداسية
عملتوا ألف حصار و حصار
و في وسط ميدان الحرية
في شعلة ماسكاها وليّة
ما تكونشي دي ليزا المخفية
مديّة إشارة إنذار
********
على العموم أنا حبيتك
و إلهي يابعيد يخرب بيتك
لو يوم هتشك في إخلاصي
وتصدق ذم الأشرار
هو سؤال و مفيهش هزار
هو أنت يعني حمار يا حمار؟
عشان تصدق إن الفارممكن يقول لأسد يا حمار
********
بعهدك والعهد أمانة
هتّنّك على طول ويانا
حمورية أهلك عجبانا
يا واخدنا من الدار للنار
كل الحمير هنا عملة تيم
واتفقوا إنك بغل عظيم
فهيوزعوا شربات برسيم
ع العربخانة وع الزوار
********
أرجوك يا حمار بس إفهمني
أنا مش حَمّـار هتخاف مني
دا أنا بردوا حمار و احمر منك
متنهّق قول أي حوار
********
بنقولك شيي مبتمشيشي
والحا بنقولها ما بتجيشي
ونقولك هس ما بتهيسش
ومكمل بينا المشوار
وعشان كده طبعا حبينك
كـلـنا بنحبك يا حمار
تجيبها يمين تجيبها شمال...هى كوسة!!
صوتوا
تصويت المصريين على التعديلات الدستورية
