اتخنقت !!!

اتخنقت !!!

بجد اتخنقت...

ايوة اتخنقت ..

انا من اكتر الناس اللى ممكن تلاقيهم متفائلين جدا جدا جدا ..

و مهما حصل بحس ان فيه شعاع نور بينادينى من بعييييد...

بس اللى بشوفه كل يوم ده حرااااام...

الناس ماشية تكلم نفسها فى الشارع من اللى بيحصل..

ساعتين فى الشارع اكتر من كفاية عشان تشوف احوال البلد العظيمة بتدهور..

طابور العربيات اللى واقف قرب كل بنزينة مستنى بنزين 80 ، و اما تقرب العربية يقولوا "خلص"..

طوابير العيش عند كل مخبز... ناس مش طايقة نفسها و هتموت و رغم ده بالساعات واقفين منتظرين ...

الموظفين المحترمين اللى مش بيكسفوا خلاص يطلبوا فلوس...

الطلاب اللى بيشتكوا من كتر المصاريف و زيادتها ، و الالزام بشراء الكتب، و و و ...

و ادخل الميكروباص ...

الناس بقت بتكلم بعضها من غير ما يعرفوا بعض ، و يسردوا مشاكلهم ...

لغة حوار مشتركة ..

مش مهم انت مين ولا قد ايه ولا بتشتغل ايه...

بدل معايا فى الميكروباص و واقف بقالك ساعة فى الاشارة يبقى احنا متساويين، و مشاكلنا واحدة..

ده الناس حتى بعد ما كان بعضهم عنده تحفظ فى الكلام قدام الناس التانية فى السياية... بقى الكل بيتكلم و كأن مفيش اى مشكلة... ماشيين بمبدأ "ضربوا الاعور على عينه "...

الناس زهقت و قرفت.. و مع قرفها احبطت اكتر و اكتر...

صحيح التفائل صفة كويسة..

بس الواحد كان متفائيل بالناس اللى لسه حاسيين ان فيه امل و شغالين معاه..

بس الناس خلاص.. هموم الحياة خدنها بعييييد .. و احبطتها كتيييير...

طب مين اللى هيرفع الامة من تانى؟؟!!!

و بما ان ده اول موضوع اكتبه بعد "ماذا يحدث فى غزة الأن ؟؟"..

فلازم اقول انى انا شخصيا مش عارفة ايه اللى بيحصل هناك دلوقتى...

مشاكلنا الداخلية بتكبر يوم بعد يوم .. و معاها املنا فى الاصلاح فى الوطن العربى بتقل ثانية ورا ثانية ...