و رجعت ريما لعمايلها القديمة!!

و رجعت ريما لعاديتها القديمة...
قصدى يعنى رجعنا للمدارس و الكليات و الذى منه...
طبعا مكنتش ملتزمة اوى اوى بالمحاضرات ... يعنى.. انا اصلا رايحة اشوف اصحابى... و بعد ما شفتهم و قعدت معاهم رحت لأصحابى فى الكليات التانية و لما زهقنا اخدتهم و رجعت على كليتى!!!
فضى بقى...

الكلية متغيرتش كتير... هى هى ... حاجة واحدة جميلة بس اللى زادت فيها...
طلاب الاخوان رجعوا يقفوا تانى فى مبانيها...
طبعا الموضوع ده ممرش مرور الكرام على أمن الكلية العظيم...
قعدوا يكلموهم و يقرفوهم و يتخانقوا معاهم .... و هم داخلين شايلين الحاجات فى شنط واحد قالهم " ايه الشنطة دى فيه قنبلة".. لأ ظريف !!... و أخر ما زهقوا جابوا أمن الكلية كلهم و حواطوهم من كل ناحية على أساس ان الطلاب ميدخولوش يشتروا حاجة من عندهم...
اللى ميعرفوهوش الأمن العظيم بتاعنا... ان فيه ناس كتيييير بتحب الطلاب دول و ماكانش منهم الا انهم زنقوا فى الأمن و دخلولهم حتى لو مش هيشتروا حاجة !!!
و مفضيش المكان الا لما المعرض خلص...
انا مش عارفة لغاية امتى هيفضل الأمن فى وادى و الطلاب فى وادى تانى...
لغاية أمتى هيفضل أمن الكلية العظيم بيعاند فى الطلاب الاخوان... و يفضل خايف منهم .. و بيضايقوهم...

الحقيقة ان اللى يخاف من عفريت يطلعلوا... الأمن دول لو وقفوا فكروا توانى قليلة .. هيلاقوا ان وجود طلاب الاخوان على مكتبهم فى الكلية بيخليهم تحت عينين الأمن .. و ان 90% من اللى بيعملوه بعيد عن السياسة تماما.. و ال 10 % اللى فاضلة دى بسبب الأمن زات نفسه و تضيقه عليهم... امتى هيفوقوا بقى من غيبوبة تنفيذ الاوامر... حتى المسجد بسببهم مبقاش مفتوح على طول...
زهقنا منكم و من اللى بتعملوه.. لو سيبتولنا منفذ نتنفس منه هتقل مشاكلنا معاكم...
نفسى بجد يكون أمن الكلية مهمته الحفاظ على الطلاب و الكلية مش انه يقرفهم و يضيق عليهم...

اهوالترم التانى بدأ...
يمكن يكون مخابيلنا تعامل أحسن من الأمن و ممكن يكون مخبى مصايب زى اللى حصلت الترم الأول...
و فى كلا الحالتين.. طول ما الأمن متغيرش.. هتفضل ريما على عاديتها القديمة !!