انا بجد تعبت.... تعبت من التفكير.... تعبت من اللى بشوفه و اسمعه كل يوم ... تعبت من اللى بحسه كل لحظه... تعبت من تقصيرى فى حق اخوانى و اخواتى المسلمين فى كل مكان ...
تعبت لأنى بتنفس و اطفالهم بيموتوا فى الحضانات ... تعبت لأنى مدفية و هم فى السقعة و المطر... تعبت لأنى عايشة حياتى بالطول و العرض وهم مش لقيين اساسيات الحياة .... تعبت لأنى مش عارفة اساعدهم.. و لا اقف جنبهم .. و لا آزرهم....تعبت لأنى بتفسح مع أصحابى فى نفس الوقت اللى هم بيعدوا حدود مصر بعد ما فقدوا الأمل...
مش عارفة المفروض نعمل ايه... ناس بقالها سنين بتحارب عشان تعيش... بس تعيش.... حلم بسيط هنا لكن شكله مستحيل هناك...طب نساعدهم ازاى؟..بفلوس؟ طب هتروح لمين و فين و هتكفى ولا لأ... بالمقاطعة... طب ما ناس كتير ( انا منهم ) مقطعين من زمان ...مظاهرات؟ طب مامحدش معبرنا ولا فى مصر ولا براها... و كل واحد بينفخ فى قربة مقطوعة...بصراحة انا لو كنت مكانهم.. هقول الناس دى مش معبرانا ليه؟... هو ده دينهم و طنيتهم؟؟!!
الواحد كل ما كان يفقد الأمل... كان بيتعلم منهم و هم واقفين قدام بيوتهم حاميينها... كان بيتفرج عليهم و يحسدهم ... و يقول هدعيلهم.... بس دلوقتى خلاص... هم كمان يأسوا... تعبوا ... فاض بيهم... مش عارفين يحافظوا على أقل حقوقهم فى الحياة ...
نعمل ايه... الكتاب و الصحفيين و الشعراء قالوا كلمتهم... الطلاب عبروا بمظاهراتهم... الجماعات و الحزاب عملوا ندواتهم... قاطعوا هنقاطع... ادعوا هندعى ... اتبرعوا هنتبرع .. بس الناس دى لسة هناك.. محدش انقذها و لا ساعدها....
الموضوع اكبر من كدة... انا مش عارفة المفروض نعمل ايه... بس أكيد اللى احنا بنعمله مش كفاية ... بدليل انهم هربوا خلاص...سابوا أرضهم اللى دافعوا عنها لسنين....سابوها للصهينة زى ما هم عايزين....
خايفة ربنا يحاسبنا يوم القيامة و يقولنا كان بايديكم الكتييييييييييير... خايفة نقف قدامه سكتين و من اخواننا مكسوفين ... و فى وسط الملايكة مفضوحين ... خايفة نكون قصرنا و منكونش فكرنا.. و اما يفوت الوقت نكون ندمنا و نقول ياريتنا و يا ريتنا...
اهى فلسطين بتتصهين و العراقيين عندنا فى القاهرة و المصريين بيهجوا لكل أنحاء العالم ، و السودان و البحرين، و لبنان.. و فى كل بلد عربى فيه مشاكل...مشاكل بتخلى أولادها يسيبوها... طب هنمشى و بعدين ... اقولك.. هنمشى و نسيبهلهم و نهرب على بلدهم ...هيحتلوا أراضينا و بيوتنا و هيكلوا من خيراتنا... و اما يظبطوا امورهم ... هيقولولنا امشوا من بلدنا ... مش عايزينكم... و مش هنقدر نرجع تانى لأنهم خلاص دخلوا بلادنا و ضموها لجنانهم ...هنكون رضناهم و عملنا اللى هم عايزينه... ولا هنحصل شرق ولا غرب...و لا هنلاقى مكان نلجأله بعد ما تخلينا عن أرضنا... المكان الوحيد – شئت ام ابيت – اللى هيفتحلك درعاته و يحتضنك فى اى وقت...
بلادنا بتضيع منا و احنا واقفين ساكتين كأننا مكبلين...بنتفرج و بكرة علينا الدور ...
واللى لسة عنده أمل فى حكوماتنا العربية العظيمة ... فوق بقى و شوف بقالهم قد ايه مبلطين.. كل يوم حالنا بيتدهور أكتر فى كل المجالات.. مستنيينهم يعملوا ايه دلوقتى...
احنا اللى لازم نعمل و نساعد اخواننا الفلسطينيين و العراقيين ... نساعدهم و هم فى مصر و نساعدهم عشان يرجعوا... على الأقل عشان اما ييجى الدور علينا .. حد يبقى يفكر فينا و يقف جنبنا و نلاقى بلد تانى يفتحلنا ابوبه ...
اللهم انصر و ارحم جميع المؤمنين
